GeoOrg është një platformë kolaborative për indeksimin gjeografik të të gjitha organizatave dhe aktiviteteve lokale shqiptare në diasporë qofshin ato studentore apo të llojeve të tjera. Ideja e GeoOrg është shfrytëzimi i njohurive të bashkësisë së studentëve dhe emigrantëve shqiptarë jashtë për zgjidhjen e një problemi relativisht kompleks që nuk mund të zgjidhet nga një person apo institucion i vetëm.

Kushdo mund të lundrojë tek harta virtuale e GeoOrg për të parë organizatat apo aktivitetet shqiptare që zhvillohen në afërsi të saj/tij. Dhe çdokush me një lidhje interneti mund të shtojë apo aktualizojë tek GeoOrg organizata të reja shqiptare apo aktivitete të zhvilluara nga këto organizata. Qëllimi i GeoOrg është i dyfishtë:

Nga njëra anë një indeks gjeografik si GeoOrg mundëson njohjen e dinamikës së krijimit dhe zhvillimit të organizatave dhe komuniteteve shqiptare jashtë në shkallë globale dhe lokale. Këto rezultate kanë rëndësi të veçantë sidomos në krijimin e politikave efikase për mbështetjen e këtyre organizatave dhe rrjedhimisht dhe të proçeseve si "thithja apo qarkullimi i trurit";

Nga ana tjetër GeoOrg shërben si një ndihmë e parë për të gjithë shtetasit shqiptarë jashtë që kërkojnë lidhje me komunitete shqiptare në afërsi të vendit ku banojnë.

Ne besojmë se angazhimi juaj dhe i komunitetit studentor në ngritjen e një indeksi të tillë është jo vetëm një tregues për forcën inovative dhe dinamikën e re që studentët po sjellin në zhvillimin e komuniteteve shqiptare por edhe i vlefshëm për shumë bashkëkombas të tjerë që jetojnë jashtë vendlindjes.

GeoOrg po nis si një projekt i AlbStudent, megjithatë zhvillimi i ketij projekti përtej rrënjëve të tij studentore është i mundshëm dhe i dëshirueshëm.